ຍິນດີຕ້ອນຮັບ ສູ່ ສະຖາບັນ ເຕັກໂນໂລຊີ ສຸດສະກະ

ສະຖາບັນ ເຕັກໂນໂລຊີ ສຸດສະກະ ໄດ້ຮັບການສ້າງຕັ້ງຂຶ້ນໃນວັນທີ 09 ກໍລະກົດ 2002 ແລະ ພາຍໃຕ້ຊື່ ສະຖາບັນ ສຸດສະກະ ເພື່ອການບໍລິຫານ ແລະ ເຕັກໂນໂລຊີ ເຊິ່ງມີເປົ້າໝາຍເພື່ອຕອບສະໜອງໃຫ້ແກ່ການພັດທະນາຊັບພະຍາກອນມະນຸດໃນ ສ ປ ປ ລາວ ເຊິ່ງເປັນປັດໄຈສໍາຄັນໃຫ້ແກ່ການພັດທະນາເສດຖະກິດແລະສັງຄົມຂອງຊາດ. ສະຖາບັນ ສຸດສະກະ ເພື່ອການບໍລິຫານ ແລະ ເທັກໂນໂລຢີ ດຳເນີນກິດຈະການໂດຍອີງໃສ່ແນວຄວາມຄິດທີ່ ບໍ່ຫວັງຜົນກຳໄລສູງສຸດ (ສະໜອງການສຶກສາທີ່ມີຄຸນນະພາບສູງ ໃຫ້ແກ່ມະຫາຊົນໃນ ຕົ້ນທຶນທີ່ສົມເຫດສົມຜົນ). ຕັ້ງຢູ່ຈຸດໃຈກາງຂອງນະຄອນຫຼວງວຽງຈັນ ເຊິ່ງເຮັດໃຫ້ການໄປມາຂອງນັກສຶກສາມີຄວາມສະດວກ ແລະ ມີຄວາມປອດໄພ.

ສະຖາບັນ ເຕັກໂນໂລຊີ ສຸດສະກະ ໄດ້ຮັບການອະນຸຍາດຈາກກະຊວງສຶກສາທິການໃຫ້ດຳເນີນການສິດສອນນັກສຶກສາໃນຫຼັກສູດຊັ້ນປະລິນຍາຕີ ແລະ ຊັ້ນສູງ ໃນສາຂາ ການບໍລິຫານທຸລະກິດ, ການບັນຊີ ແລະ ວິທະຍາສາດຄອມພິວເຕີ. ນອກນັ້ນ, ທະນາຄານແຫ່ງ ສ ປ ປ ລາວ ຍັງໄດ້ອະນຸຍາດໃຫ້ສະຖາບັນພວກເຮົາ ເປັນສູນຝຶກອົບຮົມການເງິນຈຸລະພາກ.

ພາສາລາວແມ່ນພາສາທີ່ໃຊ້ໃນການສິດສອນ ແລະ ການບໍລິຫານຂອງສະຖາບັນພວກເຮົາ. ແຕ່ເຖິງຢ່າງໃດກໍຕາມ, ນັກສຶກສາທີ່ບໍ່ຮູ້ພາສາລາວ ຫຼື ມີຄວາມຊຳນານດ້ານພາສາອັງກິດ ສາມາດເຂົ້າຮຽນໃນຫຼັກສູດທີ່ສອນໂດຍໃຊ້ພາສາອັງກິດ.

ສະຖາບັນ ເຕັກໂນໂລຊີ ສຸດສະກະ ແມ່ນບ່ອນທຳອິດ ທີ່ໄດ້ຮັບການຮັບຮອງຈາກອົງການສອບເສັງທຽບລະດັບພາສາອັງກິດຂອງສະຫະລັດອາເມລິກາ ໃຫ້ດຳເນີນການສອບເສັງທຽບລະດັບພາສາອັງກິດ TOEFL® iBT ໃນ ສ ປ ປ ລາວ ໃນເດືອນ 7 ປີ 2006 ແລະ ໄດ້ຈັດການສອບເສັງຄັ້ງທຳອິດໃນ ສ ປ ປ ລາວ ໃນເດືອນ 8 ປີ 2006.

ນັກສຶກສາທີ່ຈົບການສຶກສາຈາກສະຖາບັນພວກເຮົາ ບໍ່ພຽງແຕ່ຈະມີຄວາມຮູ້ດ້ານວິຊາການທີ່ຕົນສຶກສາ ເທົ່ານັ້ນ ແຕ່ຍັງມີຄວາມຮູ້ ແລະ ທັກສະດ້ານການເປັນຜູ້ນຳ, ຄວາມສາມາດດ້ານການສື່ສານກັບບຸກຄົນອື່ນ, ແນວຄວາມຄິດສ້າງສັນ, ຮັບຜິດຊອບຕໍ່ສັງຄົມ ແລະ ມີຄວາມກະຕືລືລົ້ນຫ້າວຫັນ. ຄຸນນະສົມບັດທີ່ດີເລົ່ານີ້ ແມ່ນໄດ້ຮັບການປູກຝັງໂດຍຜ່ານວັດທະນະທຳອົງການຂອງພວກເຮົາທີ່ນັກສຶກສາ ມີຄວາມໃກ້ຊິດຕິດແທດໃນແຕ່ລະວັນ ແລະ ຜ່ານກິດຈະກຳນອກຫຼັກສູດຕ່າງໆຂອງພວກເຮົາ. ທີ່ສະຖາບັນພວກເຮົາ, ນັກສຶກສາຈະໄດ້ຮັບການຊຸກຍູ້ໃຫ້ເຂົ້າຮ່ວມກິດຈະກຳຕ່າງໆຂອງສະຖາບັນ ໂດຍອີງຕາມຄວາມມັກ ແລະ ຄວາມທະນັດຂອງນັກສຶກສາແຕ່ລະຄົນ. ດ້ວຍວິທີນີ້, ພວກເຮົາສາມາດດຶງເອົາຄວາມສະມາດສະເພາະຂອງນັກສຶກສາແຕ່ລະຄົນອອກມາໄດ້ ເຊິ່ງຄວາມສາມາດສະເພາະນັ້ນຈະຊ່ວຍໃຫ້ນັກສຶກສາປະສົບຜົນສຳເລັດໃນອະນາຄົດໄດ້. ພວກເຮົາໄດ້ມີການຈັດກຸ່ມ ແລະ ທີມກິລາປະເພດຕ່າງໆໃຫ້ນັກສຶກສາ.

ສະຖາບັນພວກເຮົາ ໄດ້ສ້າງຕັ້ງກຸ່ມຫຸ່ນໂລບອດ (Robotic club) ໃຫ້ນັກສຶກສາຄະນະເຕັກໂນໂລຊີຂໍ້ມູນຂ່າວສານ ໂດຍມີເປົ້າໝາຍສ້າງໃຫ້ນັກສຶກສາມີແນວຄວາມຄິດສ້າງສັນ ແລະ ມີປະສົບການໃນການສ້າງຫຸ່ນຍົນ ແລະ ຂຽນໂປຣກຣາມຄອມພິວເຕີ້ຝັງໃສ່ໃນໂຕຫຸ່ນ. ໃນແຕ່ລະປີ ພວກເຮົາໄດ້ສົ່ງຫຸ່ນເຂົ້າແຂ່ງຂັນໃນງານແຂ່ງຂັນຫຸ່ນຍົນນານາຊາດທີ່ຈັດທີ່ນະຄອນຫຼວງວຽງຈັນ.

ສະຖາບັນພວກເຮົາ:

• ສິດສອນໃນຫຼັກສູດຊັ້ນປະລິນຍາຕີ, ຊັ້ນສູງ ແລະ ຕໍ່ເນື່ອງປະລິນຍາຕີ;
• ດໍາເນີນວຽກງານດ້ານບໍລິການທີ່ປຶກສາໃຫ້ໂຄງການດ້ານການພັດທະນາ ແລະ ບໍລິສັດເອກະຊົນຕ່າງໆໃນລາວ;
• ຮ່ວມມືກັບອົງການລັດ, ອົງການສາກົນ ແລະ ບໍລິສັດເອກະຊົນຕ່າງໆ ກ່ຽວກັບວຽກງານດ້ານການສຶກສາ ແລະ ການພັດທະນາ;
• ຈັດກອງປະຊຸມສຳມະນາດ້ານວິຊາການ ແລະ ການຝຶກອົບຮົມໄລຍະສັ້ນຕ່າງໆ.